ينبوع الحب

ينبوع الحب
**********************
عادل : انت مش قادر تفهمينى يا سامى
سامى : مش قادر افهمك ايه .. بقى تسيب ابحاثك وتجاربك علشان تعمل وردة
عادل : الوردة دى مش عادية.. دى وردة الحب الانسان اللى يشمها يحب كل الناس
سامى : ياسلام
عادل : انا هوريك
سامى : ازاى بقى ؟
عادل : انده مصيلحى البواب علشان نجربها عليه
سامى : اشمعنى مصليحى
عادل : بيكره كل الناس وكمان علشان مبيعملش حاجة الا بفلوس
سامى : عادل انت متاكد
عادل : اندهله وانت تشوف ( يخرج ثم يدخل وهو يدفع مصيلحى )
سامى : ادخل بقى عزبتنى
مصيلحى : متزقنيش بقى .. انا مش شغال عندك
سلوى : بقولك ادخل
مصيلحى : بقولك ايه منيش داخل يعنى منيش داخل
عادل : يا مصيلحى اهدى .. ما انت دخلت خلاص
مصيلحى : هه دخلت .. طب منيش خارج
عادل : خلاص يا مصيلحى .. تعال تعال انا عايزك
مصيلحى : ايوه يا بيه .. بس ابعد مرتك عنى
عادل : انا عايزك فى حاجة مهمة
مصيلحى : خير يا بيه
عادل : اسمع .. انا هعمل معاك صفقة
مصيلحى : صفقة اوه ...يا بيه يعنى انت هتطبل وانا اصقف.
عادل : اصقف ايه واطبل ايه .. صفقة يعنى بزنس
مصيلحى : ايوه ايوه .. بس بس قطط يعنى
عادل : قطط ايه .. بقولك ايه سيبك من كل ده .. قولى يا مصيلحى انت بتحب
مصيلحى : ليه يا بيه حضرتك شايف لى عروسة
عادل : عروسة .. لا يا مصيلحى مش قصدى الحب ده .. انا قصدى الحب التانى
مصيلحى : ايوه فهمت يا بيه
عادل : فهمتى ايه "؟
مصيلحى : انا بحب الملوخيى بالتقلية
عادل : تقليه ايه يا مصيلحى .. انا اقصد حب الناس.. تحب الناس ويحبوك .. يعنى انت مثل ايه رايك فى سامى اخويا . بتحبه
مصيلحى : قبر يلمه قال يزقنى واحبه
سلوى : انت بتقول ايه ؟
عادل : استنا بس يا سامى . طيب انا هعمل معاك اتفاق ... لو شميت الوردة دى هديك 5 جنيه
مصيلحى : معقول اشم وردة واخد 5 جنيه .. طيب بقول لك ايه يا بيه انا هعمل معاك صفقة .. اكلها وتدينى 10 جنيه
عادل : يا مصيلحى انت هتشمها وبس وتاخد 5 جنيه
مصيلحى : خلاص يا بيه هات
عادل : براحة يا مصيلحى وانت بتشمها

( 1 )
مصيلحى : متخافش يا بيه دا نا شمام كبير
عادل : فعلا انا كنت شاكك فى كده من زمان
سامى : احنا استحملناك كتير قوى متشم بقى وتخلصنا
مصيلحى : عادل بيه ابعد الراجل ده عنى
عادل : تعال هنا يا سامى ( مصيلحى يشم الوردة ويطوح ثم يسقط ) ايه ده .. الظاهر انه مات .. نجحت يا سامى
سامى : نجحت نجحت ايه بس .. دا باين عليه مات فعلا .. انا كان قلبى حاسس
عادل : مصيبة ليكون مات بجد
سامى : ايهده دا ابتدى يتحرك اهوه
مصيلحى : اه يا دماغى اه يا نفوخى
عادل : مصيلحى .. حاسس بايه؟
سامى : انا هجيب له كباية ميه
عادل : بسرعة يا سامى
مصيلحى : نفوخى يا باه .. حاسس ان فيه قردين عيتعاركوا فيها
عادل : عيتعاكو يعنى ايه ؟
مصيلحى : يا عيتخانقوا يا بيه
سامى : الميه اهه
عادل : خد خد يا مصيلحى اشرب
مصيلحى : ايه دى ميه .. معندكمش عصير كلب اشيله
سامى : فى عصير فى الدنيا اسمه كلب تشيله
مصيلحى : ايوه
سامى : ميكونش قصدك كابتشينو
مصيلحى : ايوه هو ده.
سامى : لا معندناش. اشرب بقى كوباية الميه دى
عادل : اشرب الميه يا مصيلحى علشان تفوق
مصيلحى : حاضر يا بيه
عادل : كفايى يا مصيلحى الكوباية جالها جفاف .. هه حاسس بايه؟
مصيلحى : خلاص يا بيه كانت دوخة وراحت
عادل : طيب والقردين
مصيلحى : بينهم اتصالحو .. انى نفوخى دلوقيت عامل زى الصفحة البيضة.. حاسس انى بحبك بحبك قوى يا عادل بيه .. ( يعفصه فى حضنه ) وانت كمان يا سامى بيه
عادل : بالراحة يا مصيلحى ضلوعى
مصيلحى : حاسس انى بحب مرتى وبنتى وبحب كل الناس
عادل : نجحت يا سامى نجحت
سامى : مبروك يا عادل مبروك
عادل : خد يا مصيلحى ال5 جنية اللى وعدتك بيها اهيه
مصيلحى : 5 جنيه ايه يا بيه .. انى بتاع الحاجات دى برضك .
عادل : هايل شوفتى يا سامى اخيرا قدرت اوصل للحب الحقيقى
سامى : فعلا يا عادل دى معجزة.
مصيلحى : اه يا راسى .. ( يطوح)
سامى : ايه ده مصيلحى بيطوح
عادل : ايه يا مصيلحى مالك
مصيلحى : اه يا دماغى .. بقولك ايه يا بيه ادينى ال5 جنيه اللى قولت لى عليها خلينى امشى
عادل : ما انا قولت لك خدها وانت مرديتش
مصيلحى : معقول يا بيه .. حد يقولى خد 5 جنيه وقوله لا
عادل : خلاص يا مصيلحى خد ال5 جنيه اهيه
سامى : طيب عايزاك تجيب لى شوية طلبات يا مصيلحى
مصيلحى : انت .. مش فاضى .. قبر يلمك

( 2 )
عادل : ايوه بس انت لسه قايل انك بتحبه وبتحب كل الناس
مصيلحى : انى قولت اكده محصلش يا بيه الظاهر انك شارب حاجة .. عن اذنك يابيه ومتشكر على ال5 جنيه
عادل : معقول فشلت بعد كل التعب ده
سامى : مش مهم المهم ان الوردة كان ليها تاثير حتى لو كان قصير
عادل : ايوه بس مش هو ده الحب اللى كنت بدور عليه .. ان بدور على حب حقيقى حب ابدى
سامى : اهدى يا عادل
عادل : انا راجع معملى تانى اشوف الغلط فين ( يخرجون ثم يعود عادل ومعه سلوى)
عادل : ايوه كده انا عرفت الغلط فين.
سلوى : عادل انت متاكد من الكلام اللى انت بتقوله
عادل : ايوه .. المهم عايزين نجرب
سلوى : عايز تجرب فى مين ؟ ( يرن جرس الباب ) دى ماما يا عادل
عادل : يا سلام جيتى فى وقتك .. اهلا .. اهلا يا حماتى
الحما : اهلا يا خويا
عادل : عاملة ايه كويسة ؟
الحما : كويسة .. المهم عاملة ايه يا سلوى يا بنتى مع المنيل ده
سلوى : ماما متقوليش كده .. دا حتى عادل بيحبك
الحما : حبه برص وعشرة خرس .. انا عارفة ختيه على ايه الاهبل المجنون ده
عادل : هايل هايل يا حماتى
الحما : مش قولت لك اهبل .. من قلة الرجالة ختك يا اهبل يا ابو ريالة
عادل : وايه كمان يا حماتى .. قولى كلامك عسل
الحما : هو ايه ده .. مالك فى ايه ؟ اكيد عامل عملة وعايز تجر ناعم ( تنزل فيه ضرب ) انطق اتكلم عملت ايه ؟
عادل : الحقونى .. انا معملتش حاجة ..
الحما : اوعى يكون مد ايده عليكى يا بت
سلوى : لا يا ماما .. كفاية هيموت فى ايدك
عادل : دانا من حبى ليكى يا حماتى جيبت لك وردة .. اهيه خدى شميها
الحما : وردة .. جايب لى انا وردة .. دالمرحوم معملهاش
عادل : عقبال ما تروحي له
الحما : ايه بتقول ايه ؟
عادل : بقول الله يرحمه .. شمى بقى الوردة وقولي رايك ايه ( تشم الوردة ) هه حاسة بايه ؟
الحما : هه .. دماغى دماغى
سلوى : عادل الحقه يا عادل ..
عادل : متخفيش اللى زى دى عزرائيل يخاف منها
سلوى : ماما انت حاسة بايه ؟
الحما : حاسة انى .. حاسة انى .. ايه ده انا فين؟
عادل : فى جهنم
الحما : انتوا مين .. هه انتوا مين
سلوى : ماما انا سلوى .. ودا عادل
الحما : سلوى مين وعادل مين؟ . انا مين
عادل : يانهار ابيض دى الظاهر فقدت الذاكرة ..
سلوى : ماما فقدت الذاكرة
عادل : يا خراب بيتك يا عادل يا خراب بيتك
سلوى : ايه مالك فى ايه ؟ قد كده زعلان على ماما
عادل : لا طبعا .. انا زعلان على فلوسى .. كنت مديها 5 الاف جنيه سلف دلوقتى مش هتفتكرهم
الحما : اه .. اه .. سلوى سلوى
سلوى : ماما .. انت عارفانى
الحما : ايوه طبعا عارفاكى . . هو ايه اللى حصل ؟
عادل : حماتى انت عارفانى؟
الحما : هو انا اتوه عن خلقتك العكرة دى .. انا ماشية وهستناكى بكرة يا سلوى
عادل : اكيد فى حاجة غلط. .. انا راجع معملى تانى
سلوى : وانا هسيب لك البيت ورايحة عند ماما
عادل : مع السلامة .. لازم اوصل للحب الحقيقى لازم ( يخرج ثم يدخل ) يارب تطلع صح المرة دى. زمان عمى سعيد على وصول دلوقت راجل نكدى ومتشائم وبيكره نفسه ( يدخل عمه سعيد )
سعيد : خير يا سعيد افندم عايز ايه ؟ .. ما هو انا مخدش منكم غير المصايب .. خير اتكلم .. واقف ليه زي الصنم اتكلم
عادل : هو انت مدينى فرص اتكلم يا عمى
سعيد : طيب اتكلم اتفضل .. ماتتكلم .. ساكت ليه
عادل : ( يمسك بق عمه ) عمى انت وحشتنى وعايز اتكلم معاك شوية
سعيد : يا سلام بقى جايبنى هنا علشان كده .. انا قولت انك اتشليت غورت فى مصيبة جات كارثة
عادل : بس كفاية ارجوك .. كل ده علشان قولت لك انك وحشتنى .. امال لو قولت لك بحبك كنت قولت ايه ؟
سعيد : اسمع انا معنديش وقت اضيعه معاك .. عايز ايه ؟ خلصنى
عادل : عمى ايه رايك فى الوردة دى ؟
سعيد : نعم وردة .. انت اتجننت
عادل : طيب خد شمها كده دى ريحتها جميلة جدا
سعيد : اشم ايه ؟ ايه الكلام الفارغ ده
عادل : عمى انا مش عايز منك غير انك تشم الوردة وتقولى ايه رايك فى ريحتها
سعيد : هو ده الموضوع اللى انت عايزنى فيه .. حاضر يا سيدى وادى الوردة اهيه( يشمها )
عادل : هه ايه رايك؟
سعيد : ريحتها غريبة قوي .. وردة ايه دى ؟ اه دماغى دماغى
عادل : هايل المفعول ابتدى .. حاسس بايه دلوقتى ؟
سعيد : حاسس ان دماغى هطير
عادل : ممتاز ..
سعيد : ايه ده .. عادل ..ابن اخويا .. وحشتنى قوى ( يحضنه )
عادل : الحمد لله نجحت
سعيد : تعال فى حضنى يا ابن اخويا تعال
عادل : انا مش مصدق نفسى .. نجحت.
سعيد : هه جبت لى ايه معاك من موزنبيق
عادل : موزنبيق .
سعيد : ايوه موزنبيق .. انا كنت هناك امبارح بس معديتش عليك كنت متاخر .. كان عندى معاد فى كندا
عادل : كندا .. عمى
سعيد : انا مش عمك .. انا هاملت ..
عادل : هاملت .. يا نهار اسود
سعيد : حاسب .. حاسب
عادل : ايه فى ايه ؟
سعيد : الصرصار كان هيدوسك
عادل : الحمد لله .. انقذت حياتى
سعيد : لابد ان تموتى .. قبل ان يطلع الفجر .. لكى اغسلك فومين فى طشت الغسيل
عادل : طشت الغسيل
سعيد : هى الساعة كام ؟
عادل : الساعة 6 .. ليه ؟
سعيد : اصل عندى معاد الساعة 5 .. مع ابو الهول يادوب الحق
عادل : ابو الهول
سعيد : ايوه ابو الهول .. زميل الدراسة والطفولة ..
عادل : ابو الهول كان زميلك
سعيد : الحضارة .. التاريخ .. المسقعة .. الكوسة ( ويخرج )
عادل : اكيد فى حاجة غلط لازم اراجع تانى

( 4 )
عادل : تعالى يا سميرة
سميرة : انا مش مصدقة الكلام اللى انت بتقوله ده يا عادل يا اخويا
عادل : انت مش بتشتكى من ان جوزك بيكرهك ودايما بيتخانق معاكى
سميرة : ايوه .. بس حكاية الوردة دى
عادل : متقلقيش .. وبعدين مش هتخسرى حاجة .. المهم هو فين ؟
سميرة : انا اتصلت بيه وزمانه جاى دلوقتى
عادل : طيب لما يجى سبينى انا اتصرف
سميرة : اما نشوف اخرتها ايه ؟ اهوه جه ( يدخل مايكل )
مايكل : مساء الخير
عادل : اهلا مساء النور ازيك يا مايكل ؟ عامل ايه ؟
مايكل : من غير لت وعجن .. خير فى ايه ؟
عادل : ممتاز هايل
مايكل : هو ايه الممتاز وهايل .. انتوا عايزين ايه ؟
سميرة : احنا عايزين نتكلم معاك شوية
مايكل : ليه خير ؟
سميرة : هو انا مش مراتك برضه يا مايكل
مايكل : وبعدين
سميرة : ولا قبلين .. عادل عايز يقولك على حاجة
مايكل : طب غور انت من وشى اما نشوف المحروس ااخوكى عايز ايه ؟
عادل : انا كنت عايز اتكلم معاك بخصوص المشاكل اللى بينك وبين سميرة
مايكل : انا مش عايز اتكلم فى الموضوع ده .. مبحبش اجيب سيرتها
عادل : طيب بلاش نغير الموضوع .. ايه رايك فى الوردة دى ؟
مايكل : طول عمرى اقول عليك هايف .. وردة ايه ؟
عادل : دى وردة جميلة جدا وريحتها حلوة قوى شمها كده
مايكل : ( يشمها ) ولا حلوة ولا حاجة .. ريحتها زى طبيخ اختك .. لاطعم ولا ريحه .. اه دماغى
عادل : كويس .. ابتدينا
سميرة : كويس ايه دا شكله بيموت
عادل : دا كده معناه ان المفعول ابتدى
سميرة : عادل .. ان مش مطمنة
عادل : استنى بس .. هه يا مايكل حاسس بايه؟
مايكل : حاسس ان .. حاسس ان
سميرة : حاسس بايه يا مايكل مالك
مايكل : انت سميرة مراتى
عادل : ايوه مراتك امال امك
مايكل : سميرة انا حاسس انى .. انى بكرهك .. بكرهك وبكرهك انت كمان .. وبكره كل الناس
عادل : انت بتقول ايه ؟
مايكل : ايوه انا بكرهكم بكرهكم كلكم ( ثم يخرج )
عادل : مش ممكن مش معقول .. ازاى
سميرة : مايكل .. مايكل
عادل : اظاهر انى فشلت .. انا خلاص فشلت .. اظاهر ان الحب الحقيقى ملوش وجود فى عالمنا ده

( 5 )
مينا : مين اللى قال كده ؟
عادل : اهلا يا مينا .. ازيك يا رانيا
رانيا : مين اللى قالك ان الحب الحقيقى مش موجود
عادل : ان اتاكدت انه مستحيل
مينا : احنا كنا زيك فاكرين كده
عادل : كنتوا يعنى ايه ؟
رانيا : يعنى لاقينا الحب الحقيقى
عادل : انتوا .. انتوا اخر ناس ممكن تتكلموا عن الحب .. دانتوا دايما فى مشاكل وخنقات مع بعض .. محدش بيحبكم من قلبكم اللى مليان كراهية.. انتوا حتى بتكرهو نفسكم
مينا : دا كان زمان قبل ما نلاقى ينبوع الحب
عادل : ينبوع الحب
رانيا : ايوه ينبوع الحب .. النهر اللى بيفيض ويزيد بالحب العظيم
عادل : هو فين ؟ هو فين ؟
مينا : بص للصليب .. وانت تشوفه
رانيا : هتشوف قصة الحب العجيب
مينا : هتشوف المسيح وهو بيدفع تمن خطيتنا وجرمنا وهو ملوش ذنب
رانيا : هتشوف ازاى ضحى بنفسه علشانك .. بدون مقابل
مينا : هتشوف اعظم حب فى الوجود
عادل : ( ينظر للصليب ) فعلا هو ده الحب الحقيقى اللى بدور عليه .. بس ازاى اقدر انول الحب ده
رانيا : بالتوبة .. توب عن خطايك وتاكد ان المسيح هيقبلك
مينا : اترمى فى حضن كنيستك واسرارها
رانيا : سلم حياتك للمسيح .. هيديلك قلب مليان حب
مينا : هيديلك حياة جديدة كلها حب
عادل : انا هتوب .. وهكلم كل الناس وقولهم انى لاقيت ينبوع الحب

ستار