مسرحيه عم عوضين الفلاح

مسرحيه عم عوضين الفلاح

الاشخاص :
عم عوضين الفلاح
هنيه زوجة عم عوضين
عمدة البلد
غفير العمدة
ضابط البوليس

المشهد الاول
العمده مع الغفير فى دوار العموديه

العمده :ها يا غفير الغبره ايه اخبار البلد كده
الغفير : البلد كلها تمام والامن مستتب يا حضرت العمده هو فى واحد يقدر يطلع نفس الا باذن سيادتك كل الفلاحين عارفين اللى بيخالف اوامرك بيحصله ايه
العمده : هما الفلاحين دول كدة ماكنتش توريهم العين الحمرا مايمشوش عدل قولى ايه اخبار الفلاحين اللى عايز اشترى منهم الارض بتاعتهم
الغفير :مع ان كلهم مش عايزين يبيعوا وعارفين انك هتشترى الارض باقل من سعرها بكتير الا انهم هيبيعوا كلهم هو فى حد يقدر يقول لا
العمدة : قصدك ايه يا غفير الغبره بهشترى الارض باقل من سعرها قصدك ان انا ظالم....... مفترى
......ضحكت عليهم
الغفير : يا خبر يا جناب العمده مين يقدر يقول كده دى البلد ملهاش سيره غير عن كرمك وعدلك وحبك لكل الناس ده انت بركتنا يا جناب العمده
العمده : ايوة كدة اتعدل بدل ماعدلك
الغفير :بس ياحضرت العمدة فى مشكله صغيره كده بس هنحلها علطول بس ماتشغلش بالك انت
العمدة : ايه المشكله دى اتكلم يا غفير الغبره فى جاموسه ماتت .ولا حد سرق قمح من المخزن بتاعى تبقى وقعتة طين
الغفير : لا لا هو حد يقدر دى مشكله ابسط من كدة بكتير بس هى ان فى واحد من الفلاحين عندة قيراطين صغيرين فى وسط الارض بتاعتك مش عايز يبيع بس هيبيع بالذوء بالعافيه هيبيع
العمده : مين الواد دة اللى استجرى ومش عايز يبيعلى ارضه لا دا انا هيبتى راحت فى البلد يا غفير
الغفير : ده الواد عوضين ابن شحته يا حضرت العمده عايزنا نروح نادبه علشان يبقى عبره لباقى الفلاحين
العمده : لا روح ناديهولى اتفاهم معاه الاول ولو نشف دماغه هكسرهاله
الغفير : امرك يا جناب العمده






المشهد الثانى
عم عوضين مع مراته هنيه فى الدار الذى يتكون من صوره للرب يسوع - طبليه اكل - طبق فول– بصل اخضر – طماطم وفلفل
رغفين عيش – اولة ميه

هنيه : ادينى عملت الغدا علشان عوضين زمانه جاى من الارض وتلاقيه تعبان من الشغل فى الارض طول النهار فى الشمس والوقفه وعايز ياكل وينام – يدق الباب – مين اللى بيخبط حاضر جايه اهو
عوضين : افتحى يا هنيه انا عوضين اه اما الواحد تعبان بشكل طول النهار واقف على رجليا مااعدش
دقيقه ها هاتاكلينى ايه علشان اكل واخش اريح شويه
هنيه : اما انا عمله ليك حبة فول هتاكل صوابعك وراهم معلش بقى كل الفراخ اللى عند نا خلصوا
عوضين : تسلم ايدك ونشكر ربنا يسوع على كل عطاياه الحلوه بسم الاب والابن والروح القدس الاله الواحد امين اشكرك ياربى على كل الحاجات الحلوه اللى انت بتدهلنا يارب بارك فى هذا الطعام زى مابركت
فى الخمس خبزات والسمكتين امين.... الله دا الفول جميل قوى من ايدك بس اللى شاغل بالى ان عمدة البلد عايز يشترى منى الارض بتاعتى
هنيه : العمده الراجل الظالم المفترى ده هو مش مكفيه كل الارض اللى عنده طيب وانت قولتله ايه
عوضين : طبعا قولت لا ماانتى عارفة الايراطين دول هما اللى حيلتنى وبناكل منهم يعنى لو بعناهم هنعيش منين. بس كل الفلاحين خافوا من العمدة وباعوارضهم ليه
هنيه : وانتى هتعمل ايه دا ظالم ممكن ياذيك انا خايفه عليك قوى
عوضين : ماتخفيش طول ما الرب يسوع معانا مين يقدر علينا هو مش مكتوب كدة فى الانجيل
هنيه : ايوه انت عندك حق يا عوضين عمر ماالرب يسوع بيسبنى دا احنا ياما مر علينا مشاكل واوقات
صعبه كتير وكان ربنا يسوع دايما بيقف معانا
عوضين : علشان كده عارفا شوال الدقيق اللى عندنا اللى بنعمل منه الفطير
هنيه : ايوة عارفاه اللى بنعمل منه الفطير لاى ضيف بيجى لينا ماله ده
عوضين : وانا فى الكنيسه يوم الحد اللى فات سمعت ابونا ميخائيل وهو بيقول ان الناس الفقرا
والمحتاجين فى البلد بقوا كتير قوى ومحتاجين حاجات كتير اكل ولبس وعلاج علشان العيد وقال ان اى حد يقدر يساعد باى حاجه ممكن يقدمها ففكرت انى اساعد بشوال الدقيق اللى عندنا ايه رايك
هنيه : بس الشوال ده اخر شوال عندنا وكان هينفع اى ضيف بيجى عندنا بنعمل منه فطير جميل بس مادام انت بتقول ان اخواتنا فى الكنيسه محتاجين يبقى خلاص وكمان انت مش هطلع احسن منى انا كمان كنت
عاينا شويه بيض علشان العيد لكن خلاص انا هوديهم الكنيسه من الصيح بدرى
- يدق الباب -
عوضين : مين اللى على الباب
الغفير : افتح يا عوضين انا غفير العمده
عوضين : اهلا اتفضل كل معانا
الغفير : وقت تانى بقى العمده عايزك تروحله الدوار بتاعه النهارده بالليل وبيقولك متتاخرش احسن انتى عارف هو ممكن يجيبك ازاى
عوضين : طيب متعرفش هو عايزنى فى ايه
الغفير : ماخبرش لما تيجى هتبقى تعرف
عوضين : ياترى عايز منى ايه العمده مانا قولت انى مش هبيع




المشهد الثالث

العمده و الغفير مع عوضين فى دوار العمده

العمده: ها يا غفير الغبره عوضين اتاخر ليه هو مش عارف انى انا مستنيه
الغفير : ايوة ياجناب العمده انا رحتله الدار وقلتله واكدت عليه انه مايتخرش حتى بالاماره كان قاعد بياكل اشى زبده واشى قشطه واشى فراخ ولاالجبنه القديمه اللى كانت غرقانه فى المش ابو دوده دا حتى عزم عليا وانا قلتله لا ماقدرش اتاخر على جناب العمده
العمده : لا برافو عليك يا واله بس مش كنت تجيب لنا شويه مش من عنده وكمان
بتقول ايه فراخ وحمام وبط . يا سلام ماشى يا عوضين بس لما تجى – يدق الباب – مين على الباب -
عوضين : ازيك يا جناب العمده . الغفير جالى وقلى انك عايزنى ضرورى ياترى هو فيه ايه
العمده : اهلا اهلا ازيك يا عوضين ....اتفضل انا سمعت كلام كده من الواد الغفير ده بس مش مصدقه انك مش عايز تبيع الارض بتاعتك ليا صحيح الكلام ده
عوضين: ايوه يا جناب العمده بس ده علشان انا معنديش غير الارض دى وباكل واعيش منها لو بعتها هعيش منين بس
العمده : دول ايراطين صغيرين فى وسط ارضى وانا علشان بعزك يا عوضين يا حبيبى انا هديك الف جنيه زياده عن باقى الفلاحين يالا
الغفير : يا سلام يا عمده على قلبك الطيب اظن كده يا عوضين تبيع للعمده بقى
عوضين : انا مش عايز فلوس زياده انا عايز ارضى علشان ازرعها ومش محتاج اى حاجه تانيه فممكن ارجوك تسبهالى
العمده :يعنى ايه الذوء مش نافع معاك انتى مش عارف اللى بيخالفنى بيحصله ايه انا ممكن اعمل فيك حاجات كتير ماتجيش على بالك بس اعمل ايه فى قلبى الطيب وافق وانا هزودك الفين جنيه يالا فكر تانى
الغفير : وافق بقى احسنلك انتى ايه مش خايف على نفسك وعلى بيتك
عوضين : الرب يسوع قال لا تخف لانى معك وانا مش خايف ومتاكد ان ربنا مش هيسبنى
العمده : يعنى معنى كلامك ان مفيش فايده يظهر كده انى هوريك الوش التانى الوحش وبكره هتندم يا عوضين وهتيجى تبوس ايدى علشان اخدها منك ببلاش يا غفير ارمى الواد ده بره
عوضين – الغفير : ارجوك سيبلى ارضى ارجوووووووووووك – تعالى يا واد
الغفير : تحب نعمل ايه مع الواد ده يا جناب العمده نعمل معاه الواجب ونخلص عليه
العمده : لا يا ابو بو مخ صغير لما نخلص مين اللى هيبعلى الارض انا عايزه يجى يترمى تحت رجلى
ويقولى ارجوك خد الارض بتاعتى ولو ببلاش بس ازاى يحصل ده سبنى افكر ازاى ازاى
.................... ايوه لقيتها بص ياغفير انت تاخد الالفين جنيه دول وتحطهم فى دار الواد عوضين من غير مايعرف وبعدين تجى علشان نروح لضابط البوليس حبيبنا نبلغ عنه ونقول انه سرقهم يلا بسرعه
الغفير : امرك يا عمدة يا عمده ايه دا انتى رئيس عصابه
العمده :ها ها ها ها علشان كل الفلاحين تعرف ان اللى بيقف فى طريقى بدمره









المشهد الرابع
العمده - الغفير – فى قسم الشرطه مع الضابط المعرفه –غرفه تتكون من مكتب وكراسى
الضابط : اهلا اهلا يا عمده ايه يا راجل ماحدش بيشوفك واحشنى وواحشتنى القشطه والفطير بتاعك
العمده : لا ابدا بس هى شويه مشاغل انت عارف الفلاحين اد ايه متعبين وانا لازم اكون معاهم واسهر على راحتهم اما الفطير والقشطه فانا عامل حسابى وجايبلك كام فطيره بالسمنه البلدى هتاكل صوابعك وراهم
الضابط : يا سلام يا عمده لو كل البلد زيك فى اخلاقك تشرب ايه اجيبلك حاجه ساقعه
العمده : فى الحقيقه انا مش جاى اشرب انا جاى علشان اقدم بلاغ فى واحد دخلته بيتى وعاملته زى ابنى وفى الاخر تصور سرقنى مش كده يا غفير
الغفير : ايوه تمام كده يا عمده
الضابط : دا مين المجرم ده وسرق منك كام يا عمده وازاى اتجرا يعمل كده فى المنطقه بتاعتى انتى عارف امبارح كنت ماشى على الزراعيه ولمحت بس شويه حرميه عايزين يسرقوا جاموسه ابو تامر ماقلكش
عملت فيهم ايه وانا كنت لوحدى دا انا بنيم المطاريد فى الجبل من العصر
العمده :يا سلام ايه القوة دى بس دا حتة ولد فلاح اسمه عوضين كنت بعطف عليه علشان هو فقير
وسرق منى الفين جنيه مش كده يا غفير
الغفير : ايوه تمام كده يا عمده
الضابط :دا يومه مش معدى دانا هعصره لحد ما يجيله جفاف ويقر على مكان الفلوس اطمن يا عمده
اعتبر فلوسك بقت فى جيبك – يا غفير روح جبلى المجرم ده من قفاه
الغفير : امرك يا باشا
الضابط : اطمن يا عمده ماتقلقش انت راجل طيب اما انا بعرف ازاى اتعامل مع المجرمين دول دا موضوع بسيط
الغفير : امرك يا باشا المجرم اللى اسمه عوضين اهو اقرب يا مجرم يا شديد الاجرام على الباشا
الضابط : انتى بقى اللى الناس بتشتكى منك اه انت هتعترف بالحقيقه ولا ناوى تتعب قلبى معاك
عوضين : انا عوضين بس مش عارف حضرتك عايز منى ايه ومين اللى اشتكى منى
الضابط : اه يعنى ناوى تتعب قلبى معاك ماشى وديت فين الفلوس اللى سرقتها يا حرامى يا نورى
عوضين : فلوس فلوس ايه انا مش فاهم حاجه
الضابط : اه اعملهم عليا الفلوس مش عارف الفلوس اللى سرقتها من سيدك العمده الى دخلك بيته
وعاملك زى ابنه
العمده : اعترف يا عوضين عن مكان الفلوس وانا مسامحك يا ابنى
الضابط : يا سلام على قلبك الطيب يا عمده بس ده ماينفعش مع المجرمين دول دا لازم يتربى
عوضين :انا برىء انا ماخدتش اى فلوس مش بتاعتى انا مش حرامى
الضابط : يعنى قصدك ايه العمده بيكذب الراجل الطيب ده بيكذب وهيستفيد ايه من كده ها قولى
العمده : انا كذاب يا عوضين ربنا يسامحك
عوضين : انا مقلتش انه كذاب انا بقول ممكن يكونوا ضاعوا هنا ولا هنا
الضابط : باين عليك انك مش هتعترف بالذؤ انا هخليك تعترف مش بالذؤ
عوضين : صدقنى انا مسرقتش اى فلوس حتى فتشوا بيتى مش هتلاقوا اى حاجه ازاى اسرق وازعل يسوع منى

الضابط : ياغفير روح فتش بيت المجرم ده ولو لقيت اى فلوس هاتها
الغفير : امرك ياباشا
عوضين : صدقنى مش هيلاقى اى حاجة علشان انا برىء
الضابط : هنعرف دلوقتى ان كنت برىء ولا لا عارف لو كنت كداب انا هعمل فيك ايه انا هجلدك
60 عصايه على ضهرك وهرميك فى السجن
الغفير : تمام يا باشا لقيت الالفين جنيه دول تحت السرير بتاعه
عوضين : ازاى دول اول مره اشوف فيها الفلوس دى انا برىء برىء
الضابط : بقى انت برىء ها يا غفير خد المجرم ده واربطه واضربه 60 خرزانه على ضهره لحد ما يعرف ان البلد مش سايبه وبعدين ارميه فى السجن
العمده : ممكن قبل ما ينضرب اكلمه كلمتين
الضابط : اتفضل يا عمده انا رايح بقى اكل الفطير اللى انتى جايبهولى
العمده : مبسوط دلوقتى يا عوضين مش كنت سمعت الكلام وبعتلى الارض وماكنش حصل كل ده وانت
مش حمل البهدله دى بس انت اللى خلتنى اعمل كده لما نشفت راسك لكن انا ممكن اسامحك وبكلمه واحده اخلى الضابط يسامحك بس اسمع الكلام
عوضين : ربنا يسوع عارف ان انا برىء واكيد مش هيسبنى اما الارض فمش هبعها ابدا
العمده : يعنى مفيش فايده يا غفير خده اجلده واتوصى بيه
الغفير : اكيد يا عمده تعالى معايا ياحرامى يا نورى
منظر للغفير وهو يجلد عوضين الذى يتالم من شدة الالم مع تشغيل موسيقى حزينه
الغفير : خد وادى كمان
عوضين : اه اه اه يا يسوع



المشهد الخامس
عوضين فى السجن يصلى للرب يسوع


بسم الاب والابن والروح القدس الاله الواحد امين
ياربى يسوع انت عارف ان انا ممديتش ايدى على اى فلوس مش بتاعتى وان انا مقدرش اعمل حاجه تزعلك انا متاكد انك مش ممكن تسيبنى علشان انا ابنك اللى قبلت ان الاشرار يستهزؤا بيك ويعذبوك ويصلبوك على الصليب من اجلى يارب اقف معايا علشان اتحمل
هذه التجربه انا من غيرك يارب زى واحد بيغرق فى وسط البحر ومفيش حد سمعه ولا
شايفه وعمال يصارع فى الامواج العاليه بس فى النهايه هيتعب ويموت لو انت ممديتش
ايدك الحلوه اللى كلها حنان وانقذته انقذنا يا رب من بحر الخطيه العميق اللى احنا غرقانين فيه وعلشان كده يارب انا بطلب منك تسامح العمده والغفير وكل الناس اللى بتعمل حاجه تزعلك من غير متقصد ورجعهم تانى ليك واديهم السلام والمحبه اللى مش ممكن هيلاقوه
الا فيك لانك قلت انا هو الطريق والحق والحياة امين





المشهد السادس
النهايه الطبيعيه
العمده: اه اخيرا خلصت منك يا عوضين اكيد بعد البهدله اللى هو شافها والسجن مع المجرمين الاشرار
اكيد دماغه لانت وهيجى يترجانى ان اشترى ارضه ولو ببلاش وبعد ماخد ارضه هرميه بره البلدهو ومراته وبكده محدش فى البلد هيقدر يخالف اوامرى او حتى يطلع نفس من غير اذنى والا هيحصله زى اللى حصل لعوضين ها ها ها
الغفير : يا عمده يا عمده الحق يا جناب العمده
العمده : مالك يا ولا ايه اللى حصل عوضين جرى له حاجه
الغفير : لا يا جناب العمده عوضين كويس
العمده : امال ايه اللى حصل اتكلم بسرعه شالونى من العموديه
الغفير : ياريت يا عمده
العمده : انت بتقول ايه يا واد
الغفير : بقول انا ارضك كلها ولعت فيها النار والمحصول كله انحرق حتى البهايم كلها
العمده : مالها البهايم كمان اتحرقت
الغفير: لا يا جناب العمده
العمده : اه ريحت قلبى
الغفير : بس كلها جات لها الفرة وماتت ومبااش فاضل منهم ولا جاموسه واحده
العمده :قلبى اه يا قلبى كله راح مره واحده كده الارض والبهايم والفلوس الى فضلت اجمعه طول عمرى
ليه بس هو انا عملت ايه يارب علشان استاهل كل ده . يارب دى اول مره تفتكر ربنا يسوع ياعمده وليه بقى كل اللى عملته وبسال ليه دا انا معملتش حاجه حلوه فى حياتى عمرى مساعدت محتاج عمرى ما فكرت احط العطا فى الكنيسه دا انا مفكرتش اروح الكنيسه نفسها واللى عملته فى الفلاحين اخدت ارضهم غصبن عنهم وعوضين المسكين اللى رميته فى السجن وهو معملش حاجه ياه يا رب دانا كنت وحش اوى واستاهل اكتر
من كده انا عارف ان الارض هتتزرع تانى بس انا مش هرجع تانى زى الاول اوعدك يا رب انى هتغير يا غفير
الغفير: نعم يا عمده
العمده : روح للفلاحين وقلهم انى هرجع لكل واحد ارضه واى حد ظلمته ىجيلى وانا هراضيه اما انا فرايح لعوضين واتارجاه يسامحنى
العمده: سمعت يا عوضين ايه اللى حصل لى
عوضين:انا اسف يا عمده مش عارف اقولك ايه بس ربنا يقويك وانا فكرت انى اديك الارض بتاعتى انت اكيد محتاج للفلوس دلوقتى
العمده : انتى ايه معقول فى حد كده بقى عايز تدينى ارضك كل حياتك وانا اللى كنت بفكر اطردك من البلد كلها
عوضين : احنا كلنا كده بس لو نعمل اللى قاله الرب يسوع لينا فى الكتاب المقدس
العمده : الرب يسوع تفتكر الرب يسوع هيسامحنى بعد ده كله
عوضين : بالتاكيد الرب يسوع سامحك علشان انتى ابنه عمرك شفت اب بيكره ابنه او مش بيسامحه لو عمل حاجه غلط بس المهم اننا منكررش الغلط مره تانى
العمده: مش راجع ليكى تانى............................................... النهايه