مسرحية فلفل

شخصيات المسرحية
فلفل: ولد يرتدي في معظم الأحيان ملابس غير متناسقة ويمكن أن تكون مضحكة أحيانا. شخصية مندفعة ولكنة طيب القلب يحب الآخرين ويريد أن يكون محبوبا.
بندقة: أخت فلفل وهي الأخت الأصغر، تتميز بالرزانة والهدوء.
زلطة: يرتدي ملابس ضيقة إلى حد ما رغم انة ممتليء الجسم. أكثر ما يميزه أنة يعشق الاكل طيب القلب وان كان أحيانا يتباهى بضخامتة رغم أنة يتمنى أن يصبح يوما اقل وزناً.
عصعص: يرتدي ملابس فضفاضة رغم انة يتميز بالنحافة وهو يعتبرها مشكلة.
هادي: طالب جديد وهو ابن مدير المدرسة . شخص هادي الطباع ومحب للآخرين ومجتهد في دراستة.
الأب : والد فلفل وبندقة وهو شخص مرح يحب أولادة و بيته جدا ويخلص في عملة.
ألام : والدة فلفل وبندقة وهي ذات شخصية هادئة ومحبة ومضحية .
الأستاذ سامح: أستاذ مدارس الأحد وأستاذ المدرسة وهو من يقوم في معظم الأحيان بتوجيه الأولاد نحو السلوك الذي يليق بأولاد الله .
هاني : ابن الأستاذ سامح .

الفصل الأول
...مش مهم اسمي ، المهم شخصي...
( يفتح الستار على بيت فلفل؛ والأم جالسة تؤدي أي عمل من الأعمال المنزلية)
ألام : يا فلفل .. يا فلفل .. أنت يا فلفل ؟!!
يدخل فلفل مرتديا جاكت بيجامة شتوية وشورت ونظارة)

الأم : (في ضيق) أنت مش سامعني ؟
فلفل: سامعك يا امي ، لكن !!
الأم : لكن اية يا ابني ؟ وبعدين اية اللي لابسة دة يا ؟ لابس جاكيت بكُم ؟
فلفل : اصلي بردان قوي قوي ، بتكتك بتكتك .!
الأم : طب والشورت اللي لابسة من تحت ، لية بقى ؟
فلفل: اصلي حران قوي قوي ومش طايق هدومي .
الأم: صحيح اللي سماك فلفل ، ما هو من عمايلك دي .
فلفل : اه ، صحيح افتكرت ، من هنا ورايح مسميش فلفل ، لكن أي اسم تاني . وسيبك من اللي انا لابسة وخلينا في الموضوع بتاع الاسم دة .
ألام: انت هتغير اسمك ولا اية ؟!
فلفل : ايوه احنا سيبنا اسكندرية علشان الكلمة دي وادينا جينا القاهرة ، ومن هنا ورايح سميني أي اسم تاني غير فلفل ، ممكن ؟
الأم : الواد اتجنن ، واحد اسمة فلفل .أغير اسمة لاية بس؟!!
فلفل : أي اسم تاني والسلام !
الأم : فلفل يغير اسمة للللللــ ... القوطة مثلا ؟ ولا اقولك لــ.. للمون. اية رايك بقى؟؟
فلفل : (في نبرة تذمر ) من فلفل للمون ؟! يا ربي. مفيش اشرف . شريف .تامر. سامر . وائل ؟ أي حاجة يا امي أي حاجة . انا زهقت من تريقة الناس علىّ وعلى اسمي ؛
الأم : خلاص يبقى سمك اشرف اية رايك بقى ؟
فلفل : ممتاز ! اشرف اشرف ميضرش ، المهم يبعد عن فلفل وخلاص ، ومن هنا ورايح اشرف مش فلفل ها ؟ ماتنسيش يا امي ، اشرف مش فلفل. ولما بابا يجي هانقولة على اسمي الجديد .هو لسة مجاش ولا اية ؟
الأم : زمانة جاي ما حكم ابوك دايما بيجي على الريحة (مستدركة) قصدي على السيرة ، هتلاقية بيخبط على الباب دلوقتي .
(طرقات باب )

فلفل : انا رايح افتح الباب .
ألام : دا ابوك يافلفل .قصدي يا اشرف . (للجمهور) مش قولتلكم بيجي على السيرة
الأب : ازيك يافلفل يا حبيبي عامل اية . ازيك يا ام فلفل ؟
الأم : أنت جيت يا ابو اشرف حمد الله على السلامة .
الأب : (باستغراب) اشرف ؟! مين اشرف ده يا فلفل؟ أنا عندي ابن غيرك أسمة اشرف ؟
فلفل : انا يا بابا اشرف .انت ليك ابن واحد واسمة اشرف .
الأب : وتضحك عليا كل المدة دي يا فلفل .قصدي يا اشرف ؟
الأم : وهو يعملك اية اذا كان كل أصحابة بيتريقة علية؟
الأب : يعني عايز تغير اسمك وأنا اللي كنت عاملك مفاجئة !!
فلفل : مفاجأة ايه يا بابا ؟
الأب : كنت جايبلك شوية قوطة ناشفة وخيار وتقعد بقى يا حلو وتعمل سلطة ذي ما أنت عايز ، وأنت تقولي اشرف ! اشرف اية بس ؟ اشرف يعرف يعمل سلطة برضة ؟ دة فلفل هو اللي محلي الحياة ومخلي لطعمها شطة كدة وبتاع ؟ !!!
فلفل : بس يا بابا أنا لازم أغير اسمي لأي اسم ثاني واختارة أنت برضة .
الأب : طبعا مستحيل اني اوافق على كدة وانا قولت كدة قبل كدة.
الأم : لية بس يا ابو فلفل .قصدي اشرف ، معلش يا فلفل .يوووة قصدي يا اشرف .
الأب : اولا لان تيتا وصيتني اني اسمي ابني الكبير على اسم جدو اللي هو بابي (في غرور).
الجميع : ايه !!
الاب : بابي يعني ابويا .دا اولا .
الجميع : طب وثانيا؟
الاب : انا مميز في كل حتة ارُحلها كل الناس تعرفني في اقل من دقيقة باسم ابو فلفل . ورابعا ...
فلفل : (مقاطعا) قصدك ثالثا يا بابا
الاب : (متجاهلا) انا الاب واعرف اكتر منك .خامسا متكلمنيش في الموضوع دة تاني يافلفل .قال اشرف قال ! انا رايح انام شوية ومش عايز كلام في الموضوع دة تاني يا فلفل يا احلى فلفل رومي في الدنيا ، وبعدين انت فاكهة أي بيت مفيهوش فلفل يا فلفل هاهاها .حد برضة يستعر من اسم جدة حبيبة.
فلفل : بس يا بابا انا استحملت تريقة الناس ، وانا في اسكندرية .لكن يابابا...
الاب : (مقاطعا) هو انت شفت اية بس ؟ دا جدك استحمل لحد دلوقت ، وانت مش قادر تستحمل برضه ! وبعدين اية يعني ما انا بقى مبسوط لما الناس تقولي يا ابو فلفل ؟ انا اشتكتلك ؟
فلفل : لكن ...
الاب : (مقاطعا) مالكنش.انتهينا. موضوع وانتهى.

(يخرج الاب)

فلفل : عاجبك الكلام دة يا ماما. بابا مش راضي اني اغير اسمي.
الام : انا زمان قولتلة الكلام دة ، لكن هو قال انها وصية تيتا.
فلفل : (بحزن) خلاص فلفل فلفل ، واية يعني ! مش هتصاحب على حد خالص ! طب اشمعنى اختي بندقة اسمها جميل قوي وكل الناس بتحب تصاحبها علشان اسمها، لكن مين اللي يصاحب واحد اسمة فلفل؟
الام : كتير قوي يا فلفل بس ادي الناس فرصة تعرفك على حقيقتك بعيد عن اسمك، مع ان اسمك مميز قوي. بس ادي نفسك فرصة تتعرف على الناس.
(طرقات الباب)
الام : شوف مين على الباب ؟! يا يا اشرف (وهي مبتسمة)
فلفل : ايوة كدة يا ماما يا حبيبتي، يا احلى ام في الدنيا.
الام : (بصوت منخفض) يا فلفل ! ومالة بس فلفل؟ فلفل فلفل بس يعيش.
(يدخل الاستاذ سامح وابنة هاني)
سامح : اهلا وسهلا بيكم في بيتكم الجديد.انا استاذ سامح جاركم وجيت انا وابني علشان نرحب بيكم في بيتنا ونتعرف عليكم وندعيكم للكنيسة بتاعتنا.
الام : اهلا بيكم شرفتونا.ثانية واحدة ننادي جوزي يوسف .. روح يا .. ونادي بابا.
فلفل : حاضر يا ماما هوا.
سامح : لحسن يكون نايم ولا حاجة، نيجي في وقت تاني، احنا اسفين على القلق دة !!
الام : لا اسف ولا حاجة انتوا نورتونا.
(يدخل الاب)
الاب : اهلا بيكم .اهلا وسهلا بجيرانا الحلوين.
سامح : انا استاذ سامح مدرس في مدرسة النور ومدرس في الكنيسة في مدارس الاحد. ودا ابني هاني.
الاب : وانا يوسف محاسب في البنك الوطني ودي المدام، (ينظر الى فلفل) ابني (بصوت منخفض) فلفل.
فلفل : (محاولا تغيير الموضوع)ويا ترى الكنيسة قريبة من هنا يا استاذ سامح؟ انا سمعتك وانت بتقول ان حضرتك مدرس في مدارس الاحد في الكنيسة.
سامح : قريبة ولا مش قريبة المهم نروح الكنيسة حتى لو في اخر الدنيا.
الاب : طبعا طبعا، ودا كل ما يطول المشوار اللي بنمشية ربنا يباركنا اكتر واكتر، ولا اية يا استاذ سامح ؟
سامح : دا كلام اكيد مفيهوش نقاش ابداً.
هاني : انا اسمي هاني وانت اسمك اية؟
فلفل : (متجاهلا) وياترى الكنيسة دي ذي الكنيسة اللي في اسكندرية ؟
سامح : كل كنايس ربنا واحدة طول ما هي بتتكلم عن ربنا.
هاني : طبعا مع اني مرحتش اسكندرية ابدا، لكن كلام ربنا واحد. وفي الكنيسة عندنا ترانيم جميلة ومسابقات وحفلات. بس انت ماقولتليش اسمك اية ؟
فلفل : ياااة ! فيها كل الحاجات دي ، دا انا لازم اروح !
سامح : واكتر واكتر، بس انت ماقولتليش اسمك اية علشان اضمك للفصل بتاعي واكتب اسمك في النشاط الصيفي ؟
فلفل : عارف يا هاني؟ يا هاني .. يا هاني (وينظر لابية وامة)
هاني : انا سامعك يا يا... هو انت اسمك اية؟
الاب : فلفل فلفل فلفل هه (وهو ينظر الى فلفل)
سامح وهاني : ايه !!
الام : اش .. فلفل.
سامح : روح بسرعة يا هاني وهات من عند ماما فلفل.
هاني : هو من اول يوم كدة على طول. النهاردة فلفل وبكرة دقيق وبعدة فطير. ما هي ناقصة.
الاب : انتوا فهمتونا غلط كل الناس عندها نوع فلفل واحد احنا عندنا اتنين فلفل: واحد في المطبخ والتاني اهو (وهو يشير الى فلفل)
هاني : اسمك فلفل ؟ هاهاها
فلفل : ايوة فلفل فلفل ، واية يعني ؟!
هاني : طب بعد ازنكم ثواني .
سامح : اية رايح فين يا ابني بس ؟
هاني : رايح اجيب شوية برطمانات علشان نساعد ماما شوية لانها طلبت مني شوية فلفل .بس هو انت فلفل احمر ولا رومي ؟
الاب : لا فلفل مخلل.
(يضحك الجميع)

فلفل : مش قولتلك ياسي بابا ،كل الناس بتتريق على اسمي عكس اختي بندقة كل الناس بتحبها.
سامح : انت ليك كمان اخت اسمها بندقة ؟
فلفل : ايوة .
هاني : طيب وهي فين علشان نتعرف عليها، دا اسمها جميل قوي ، بندقة مش فلفل!!!
فلفل : سامع يا بابا اسمي محدش بيحبة، فيه حد في الدنيا يصاجب حد اسمة فلفل ؟!
الاب : الواحد بشخصيتة يا استاذ فلفل ، ولا اية يا استاذ سامح قولة حاجة ؟
سامح : بص يا فلفل ياابي انا هقولة حاجة بسيطة. انت فية حد من اصحابك كان تخين شوية.
فلفل : (متذكرا) ايوة كان ليّ واحد صاحبي كان تخين قوي.
سامح : طب والتخين دة الناس تقولة اية ؟؟
الجميع : يا تختخ...
سامح : ولو الواحد رفيع الناس تقولة اية ؟!
الجميع : يا عصعص...
سامح : ولو فية واحد طويل ؟!
الجميع : يا زرافــة...
سامح : ولو قصير الناس تقولة اية ؟
الجميع : ياقزعة.
سامح : بص يا فلفل انت مهما كنت متقدرش ترضي الناس كلها، لكن من الناس اللي بتقابلها ناس بتحبك وناس تانية مش بتحبك فالناس اللي بتحبك دي بتحبك علشان اية ؟!
فلفل : مش عارف.
سامح : مش علشان اسمك حلو او وحش، لكن بتحبك علشان الحاجات الحلوة اللي في شخصيتك.
فلفل : زي اية الحاجات دي يعني ؟
سامح : ادبك .. سلوكك.. في كنيستك في الشارع في البيت في مدرستك... كمان شطرتك والتزامك.. لكن مستحيل تلاقي واحد بيحب واحد علشان اسمة حلو.
الام: واقولك على حاجة يا فلفل، ممكن تلاقي الاسم عكس طبع الشخص.
هاني : ايوة صحيح، انا كان ليا واحد صاحبي اسمة خير، وهو عمره ما يعمل أي حاجة فيها خير ابداًَ . وواحد تاني اسمة مودي شقاوة وهو اهدى واحد ممكن تقابلة في حياتك.
سامح : خلاصة الموضوع يا فلفل: ارضى عن نفسك زي ما انت ، مش مهم اسمك اية ولا لونك اية، ابيض احمر ولا حتى اسمر مش مهم . المهم ادي نفسك فرصة تتعامل مع اصحابك زي ما انت من غير تجميل او تذويق. حب الناس واخلص في حبك تلاقي كل الناس تحبك يا فلفل. وعلشان تحب الناس لازم تتعلم الحب من منبع الحب اللي هو ربنا.
الجميع : اتعلمت يا فلفل ؟؟
فلفل : اتعلمت
الجميع : فهمت يا فلفل ؟؟
فلفل : فهمت .
الجميع : والدرس اية يا فلفل ؟؟
فلفل : فلفل فلفل واية يعني، مش مهم شكلي او حتى اسمي، المهم احب الناس واخلص في حبي.
الجميع : حرمت يا فلفل؟
فلفل : حرمت .
الجميع : وبكرة يا فلفل؟
فلفل : بكرة بقى فلفل جديد، وهو فلفل الموقعاتي . اوعى مقالب فلفل....!!!
الجميع : لوني واسمي وشكلي كله ملكك ربي...
(انـــتــــهـــــى)